【明報專訊】下個禮拜開始，一眾政治助理將會空群出動，入中學向高中學生講解施政報告入面同年輕人有關嘅「三業三政」內容。政務司長張建宗噚日就為政助搞咗一場「簡介會」，講清楚呢次任務嘅目的，除咗想畀學生知道呢一屆政府好關心年輕人，仲叫大家留意吓有冇啲特別出眾嘅學生，將來可以邀請佢哋入「焦點小組」，畀意見政府。

張建宗提醒政助，要畀班學生感覺到官員真係會走到年輕人身邊「同行」。Emily聽聞，張建宗仲強調要政助放低身段，唔淨係單向同年輕人講政策，重點係要互動，收集學生嘅諗法，帶入下年初成立、由佢主持嘅青年發展委員會。張建宗無話有啲咩話題唔可以同學生討論，仲好細心咁點出各政策中，對年輕人切身影響較大嘅部分，希望政助可以掌握到要點。Emily聽聞，政府希望呢個係定期行動，做完第一輪之後會再檢討。