【明報專訊】第6屆香港食品嘉年華喺今個月28日至11月5日,一連9日喺葵涌運動場舉行。主辦單位香港中華廠商會將今年主題定為「健康飲食與生活」,會長李秀恒話今屆活動會比以往嶄新,大約有260個攤位。
分四大主題展區
副會長戴澤良介紹,嘉年華有四大主題展區,分別係「健康有機區」、「休閒食品區」、「餐飲用具區」同「為食Guide」。佢話今年「為食Guide」嘅規模係歷屆最大,熟食檔攤位由19個增加到50個,中西美食有齊,有本地嘅長洲大魚蛋、台灣蚵仔煎、阿拉伯烤肉,仲有1蚊海蜇頭等震撼價食品。
另外,今屆嘉年華嘅另一賣點係有9架美食車會輪流駐場,戴澤良話以前美食車只會喺旅遊區出現,好多人都唔知架車嘅位置,今次就唔使周圍搵,嚟嘉年華就搵到喇!佢話,上年嘉年華有30萬人流,佢希望今屆可以增加3萬。入場門券每張5元,噚日開始網上發售,亦可以喺展期內即場買。
廠商會今年底舉行會長選舉,目前正值會董選舉,有會董之前話畀人冒名收集選票,搞到報警。副會長史立德同有意競逐會長的廠商會副會長徐炳光仲要對簿公堂,兩個當事人噚日冇現身嘉年華記者會。
會長李秀恒就承認,日前開咗個緊急會議傾選舉嘅事,話有啲會員唔了解選舉程序,所以高層就特別開會解釋清楚,防止有咩傷和氣嘅事出現。