【明報專訊】青年民建聯噚日同傳媒茶敘，介紹佢哋撰寫嘅《青年政策建議書》，想趕及喺下月《施政報告》發表前，提出有關青年學業、就業、房屋、參政議政的建議。

促提高持續進修金額至兩萬

青民主席顏汶羽、副主席招文亮、胡綽謙、張思穎等人，噚日講吓有咩建議，包括提高持續進修基金受惠金額至兩萬元，並考慮增加資助次數和拉長年期；強化職業教育，喺人手短缺嘅行業，如安老護理業推行「先聘請後培訓」計劃。參政議政方面，就提出規定各政策局同部門要加入「青年影響評估」。

對於政府期望改組中策組同埋用合約公務員形式聘請20至30個青年做研究員，青民話咁做只會吸引到一班經驗淺嘅年輕人加入，吸引力不足，建議政府用特邀顧問形式，委任唔同政治背景、階層嘅青年組成「年輕版行政會議」，做「政府的青年腦袋」。

顏汶羽話，今屆政府強調關注青年政策，所以他們趁住該黨早前約見勞福局長羅致光和運房局長陳帆時，帶埋份建議書去，巧合咁羅致光話政府正就「持續進修基金」做緊檢討，年底會有結果。