【明報專訊】由香港藝術家劉小康設計嘅花瓶型竹藝燈籠，今個農曆新年照亮三藩市市政中心廣場。呢個名叫《歲歲平安》嘅巨型裝置，由6座高16呎至20呎不等嘅竹藝燈籠組成，展出日期至3月10日，噚日(三藩市時間1月30日)大年初三舉行亮燈儀式。

印華人姓氏英譯名

舊金山亞洲博物館同時展出一件6呎高版本燈籠，同廣場上嘅裝置互相呼應。呢啲燈籠由紮作工藝師喺香港用竹條紮製，再運到三藩市。4個工藝師仲專程去到三藩市包裹防水纖維布料同安裝內部LED燈泡，喺市政廣場完成全個裝置。

燈籠外圍顏色鮮艷，上面印咗華人姓氏及英文翻譯，劉小康話係受華人移居美國嘅姓氏翻譯經驗啟發。花瓶個「瓶」字同平安個「平」字同音，所以華人成日用花瓶比喻平安，劉小康話呢組竹藝燈籠裝置唔單止有華人移居美國嘅歷史，仲係畀三藩市同市民嘅祝福，希望農曆新年間「家家戶戶，歲歲平安」。

今次嘅展覽係香港駐三藩市經濟貿易辦事處，為慶祝香港特別行政區成立20周年而贊助嘅活動。