【明報專訊】香港浸會大學學生會前晚喺學校舉辦候任議員對談活動，邀請同係新界西立法會議員嘅鄭松泰同何君堯，討論近日社會議題。台下發問環節期間，有同學就住自由黨周永勤「棄選」事件中，聲言要「追擊周永勤」嘅錄音帶主角黃四川一事詢問何君堯。

陳同學問，何君堯聲稱同助選義工黃四川唔熟，言論有冇違反「十誡」裏面嘅第九條。何君堯重申，「黃四川佢支持我好多謝，佢係我好朋友，所以我係……一早我已經講明咗㗎，唔知點解你感覺我好似出賣佢咁，完全冇啲咁嘅嘢」。

陳同學又追問本身係基督徒嘅何律師，「十誡」第九條係乜嘢？唔知係咪一時情急諗唔起，何律師話「十誡嘅嘢我諗我好難答晒你」，又形容自己「唔係咁叻仔嘅基督徒，都唔係咁虔誠嘅基督徒」。之後陳同學為佢解開謎底，「第九條係不可作假見證陷害人」。