【明報專訊】上月除夕晚政府公布咗「消除性小眾歧視諮詢小組工作報告」，裏面無講明要立法消除歧視，一批爭取性小眾平權嘅團體唔肯收貨，要求立即啟動性傾向歧視立法程序，本身係諮詢小組成員嘅立法會議員陳志全(慢必)、香港女同盟會楊煒煒同彩虹行動陳諾爾，仲即場話要從呢份工作報告除名，表明否定呢份報告。

政府：諮詢共識經反覆商議

政府發言人就話，諮詢小組舉行咗14次會議，討論其他司法管轄區嘅措施同經驗、考慮咗性小眾歧視顧問研究報告，同聽取持份者意見後草擬建議，每項都係小組成員反覆商議先至拍板，係唔同意見之間嘅最大共識、現階段嘅可行方案。

曾擔任諮詢小組首席研究學者嘅港大社會工作及社會行政學系副教授何式凝話，佢所做嘅調查反映，大部分受訪者都贊成立法，所以好質疑點解報告唔講明要立法。

14個撐性小眾平權團體聯署搞聲明，要求即刻立法之餘，仲批評諮詢小組主席張妙清嚴重失職，要求佢交代。