【明報專訊】銅鑼灣書店負責人李波等人失蹤事件引起社會極大關注，特首梁振英(CY)噚日回應事件時，被問到李波「用自己的方式」返回內地，係咪即係香港海關執法不力呢？CY話案件正在調查，希望任何人特別係李波本人提供相關資料。CY呢個講法成為唔少網民創作嘅題材，有人揶揄，叫失蹤者提供資料就等於老師喺班房講「邊位同學無返學請舉手」，又或等同警方呼籲被通緝者提供自己匿藏位置，話香港人真係要自求多福。

揶揄CY 如問「邊個無返學舉手」

有網民就諷刺話要學梁振英所講，「有時真係忍唔住笑」，但亦有認真嘅網民，覺得呢個說法充滿電影嘅黑色幽默。李波喺「報平安傳真信」中講到以「自己的方式」返內地，不時就本地時事發表感想嘅學者沈旭暉，就貼出一張同「叮噹」卡通人物嘅合照，話自己「正以自己的方式返來，如有意外肯肯定只是時光機失靈，除非唔係」。

另外，銅鑼灣崇光對開嘅軒尼詩道行人過路處，噚日下午有人放咗一個掛紙擺設，擺設一邊寫有「他們在那裡」，另一邊係「不能視而不見」，吸引唔少途人注目。