【明報專訊】?家咁多人喺網上搵工，就連僱主喺網上都愈來愈活躍。有招聘機構做咗個調查，發現每3名招聘經理中，就有一個會喺評估候選人時透過網上社交媒體搵資料。有人力資源顧問話，試過有人應徵市場推廣工作，原本接近得手㗎喇，但因為僱主喺佢facebook見到佢有好多夜蒲clubbing相，怕影響日頭工作，結果錯失機會。各位有心搵工嘅人要小心管理自己嘅社交媒體喇。

怕請錯人搞心理測驗

招聘公司翰德(Hudson)舊年11月訪問咗243個在職人士及招聘經理，發現36%招聘經理會喺社交媒體搵有關求職者嘅資料；同時亦有愈來愈多僱主為免「請錯人」，會喺招聘過程中加入心理測驗，有42%高級主管仲話非常注重測驗結果。在職人士方面，有七成人話唔怕未來僱主喺網上搜查佢哋嘅資料，八成人會定時更新個人履歷。

安俊人力資源顧問有限公司董事總經理周綺萍話，的確愈來愈多僱主用社交媒體蒐集資料，例如應徵者會唔會見工時好正經，但facebook啲相就好暴露、愛夜蒲。另外報告顯示，求職者今年搵新工作時首3項考慮因素依次為「更高薪酬」、「工作與生活平衡」及「更優厚福利」。