【明報專訊】由富二代、建制二代等人士組成嘅菁英會，外界未必好了解佢哋嘅工作，但查實喺建制圈子內，佢哋都有一定地位，好似政府話要搞青年政策、同青年多溝通，連內部文件舉例都提到菁英會，去年8月佢地換屆，特首梁振英、政務司長林鄭月娥等多名高官都有到場。

將籌備「博鰲青年論壇」

雖然菁英會不時搞吓大型招聘會、暑期實習計劃等活動，但政界二代俱樂部嘅感覺都幾重，好似現任主席就係立法會議員梁君彥個仔梁宏正，佢哋嚟緊7月會換屆，Emily聽聞接任主席嘅，會係全國政協委員盧文端個仔、現屆常務副主席盧金榮。

菁英會嚟緊嘅大型工作，相信係「博鰲青年論壇」，呢個活動去年無喺香港搞，今年就會搞番，睇番往績，唔少政商界名人都會出席，唔知今年佢哋會唔會請到京城高官嚟演講呢？