【明報專訊】立法會嘅「拉布大作戰」噚日揭幕，唔少建制派議員帶同抗議牌、標語同道具去反拉布，要求主席曾鈺成剪布。民建聯帶咗「拉布計時器」、工聯會王國興出動「9999純金剪刀」促請主席盡快剪布。去年寫大字嘅王國興，仲帶咗6張大海報解釋拉布一日浪費255萬公帑，話呢個金額夠買16.4萬罐午餐肉或者12.8萬罐豆豉鯪魚！

長毛：本來無布 庸人自剪

主力拉布嘅社民連梁國雄(長毛)同人民力量陳志全、陳偉業就「兩手空空」無帶道具。長毛開會時就質疑其他議員擺出嘅反拉布道具係咪同議程有關，王國興同民建聯李慧琼都解釋話道具同拉布絕對有關。

曾鈺成就話，希望長毛用事實證明唔係喺度拉布，長毛回應話﹕「本來未有布，庸人自剪之，係咪過度神經緊張？」

拉布剛開始，下午4點左右就流會，當唔少議員為缺席立法會致歉時，工業界林大輝就話「不知幾開心」，因為佢可以趕得切夜晚去九龍仔公園踢波。