【明報專訊】好多公公婆婆鍾意申請成為地區組織嘅會員，因為有時去飲茶或者去旅行可以有優惠，慳得一蚊得一蚊。不過，Emily最近收到住喺石籬邨嘅婆婆投訴，佢話3月份去「大白田新動力」登記入會後，分別收到兩封選舉事務處嘅更改選民資料通知書。婆婆話，登記時畀咗啲個人資料畀職員，唔知係咪有人「幫」佢改資料咁話。

婆婆話登記入會嗰時，口快快講咗阿仔嘅地址、自己身分證畀職員，之後喺一份文件簽名。婆婆話識字唔多，所以唔知份文件係咩。無幾耐就喺3月15同26號，分別收到選舉事務處嘅信，話已經幫佢轉咗用阿仔嘅地址。婆婆收信後去搵民主黨區議員林紹輝幫手，去選舉事務處投訴。

大白田新動力社區主任、民建聯郭芙蓉同Emily講，市民入會時，會問佢想唔想順便登記做選民，盡公民責任，但強調一定會得到當事人同意先協助填寫選民登記表。選舉事務處話，婆婆嘅情况特殊，已經有職員向佢了解。處方話，如果接獲有懷疑虛報住址資料嘅個案，會嚴肅處理，有需要時會將個案轉介執法機關跟進同調查。