【明報專訊】內地嘅司法制度係咪公平、法院判案有幾公正，唔同人有唔同意見，而身為人大代表嘅譚惠珠，就大讚內地司法制度近年積極改革，話內地法院善用互聯網同市民接觸，讓群眾可以「零距離」感受法院工作，簡直係「以法治國、披荊斬棘、奮進」。Emily就想知道，喺內地被囚嘅維權律師許志永，會唔會覺得呢啲司法改革係進步表現？

薄熙來案網上直播做例子

身兼人代嘅基本法委員會委員譚惠珠，噚日出席中華總商會、香港友好協進會合辦嘅「解讀『兩會』論壇」時，話怕台下聽眾「聽唔明」佢講普通話，特意改用廣東話發言，正當大家以為佢有「北大人」重要風聲發送，最後只係聽到珠姐大讚內地「開通」微博後「群眾走進法院、走近法官」，讓群眾可以「零距離」感受法院工作。

珠姐噚日以「法網新猷」為題，大讚中國喺立法、司法、刑事檢控同反貪工作充分利用互聯網，例如去年薄熙來案就全程直播庭審情况，而中紀委同高檢就「同撒天網」，透過互聯網接收舉報，互聯網可謂「天眼處處」。

珠姐話內地司法改革讓群眾可「零距離」感受法院工作，不過資深大律師、公民黨湯家驊就認為，內地司法改革未達到最低要求，佢話，內地司法制度走向透明公開佢當然歡迎，但睇到內地維權律師屢被迫害，就知道內地司法情况仲有好多改善空間啦！