【明報專訊】明報前總編輯劉進圖(Kevin)遇襲案過咗一個禮拜，特首梁振英二女梁齊昕早前喺facebook話睇唔到事件同新聞自由有咩關係，引起網民喺佢fb「洗版式」批評，仲掀起演藝界討論。事件餘波未了，梁齊昕噚日電郵回覆《信報》查詢時，話堅持當初嘅睇法，唔會撤回早前言論，並批評啲網民肆意利用劉進圖案，「從中獲利」去反對政府，令佢感到憤怒。

批網民用遇襲案反對政府

梁齊昕話，睇咗網民嘅回覆後，覺得佢哋傾向搵一啲事件作為藉口，將所有事都怪罪港府同中央頭上；今次事件可能真係同大家諗嘅原因有關，但有確實證據前，唔應該亂估及作偏執假設。對於點睇網民對佢老竇梁振英嘅批評，以及點睇香港嘅人權及言論自由狀况，佢都不予置評。

Emily噚日上佢facebook睇過，無再更新任何對呢件事嘅言論，只係上載咗張Haribo熊仔糖嘅相。特首辦就回覆話，特首已經喺Kevin遇襲當日，就佢本人同政府嘅立場發表聲明，唔再評論其他人嘅個人言論。