【明報專訊】泛民飯盒會23名成員今日會再喺立法會向特首梁振英(CY)提出不信任動議，提出動議嘅公民黨郭家麒噚日喺記招話，要數盡CY過去一年嘅過失，成呎厚講稿都講唔晒。不過，出席記招嘅議員各自講完立場後，就鳥獸散急急腳走，一條提問都無答，唔通趕住去食飯？ 泛民記招鳥獸散 今次已經喺泛民議員繼去年12月後，第二次向CY提出不信任動議，其間CY民望一直低位徘徊，而港大最新民調，對CY嘅反對率又升至55%，唔知傳聞新任新聞統籌專員馮煒光會否又失言講「三個字﹕『不予置評』」？ 郭家麒就陪網民玩呢個「三字遊戲」，佢話對CY評價「只有一隻字﹕『不能接受』」；一向比較正經嘅公民黨梁家傑就費事玩馮煒光，話贈CY十二隻字﹕「對內失信無能，對外喪權辱港」。 卿姐著吊帶裙被否決 民主黨主席劉慧卿續批CY用人失當，連馮煒光都傳出有望做新聞統籌專員，真係幾多隻字都無謂講。卿姐前排自爆想著吊帶裙為黨慶拍片，但疑因太性感畀黨友否決，噚日佢就轉行冷艷黑絲路線，著咗件若隱若現嘅黑色喱士衫，仲舉起V字手勢問Emily﹕「係咪好靚呢？」
|
| |
| |
;){kind=small}
