【明報專訊】由會展舊翼點去新翼？Emily當然係用腳行啦！噚日傍晚連續去咗《文匯報》同光大集團兩個酒會，Emily喺舊翼跑去新翼趕場時，見到中聯辦主任張曉明上車「閃人」，點知去到光大酒會又見到張主任現身，唔通佢係搭車趕場？Emily估，張主任咁做係基於保安安排嘅方便。 張主任噚日去《文匯報》成立65周年慶祝酒會，罕有地無致辭，事關佢要幫習近平主席讀封賀信，讚揚文匯報與祖國同心，支持特區政府施政。《文匯報》咁支持特區政府施政，政府官員噚日當然畀面出席酒會，不過，教育局長吳克儉就機不離手好忙碌，坐埋一邊好肉緊咁睇手機，唔通又係瀏覽Bloomberg睇股票？吳局長即刻同Emily澄清﹕「仲夠膽睇？」原來佢覆緊電郵做緊公事，Emily當然明白啦，啱啱搞完開學，嚟緊又要諗下皇后山用嚟起樓定起學校，有排忙。 黃定光幫老婆挽袋 噚日酒會斛籌交錯，Emily喺人海中見到一個sweet場面，就係民建聯立法會進出口界議員黃定光(象哥)全程幫老婆挽手袋，象哥知道畀人發現後好尷尬，細細聲同Emily解釋，原來佢屋企個「行政長官」要上台做主禮，象哥仲攬住個手袋叫Emily唔好笑佢𠻹！Emily覺得直情要頒個愛妻獎畀象哥啦！
|
| |
| |
;){kind=small}
