【Emily】增人工魚礁 三跑水域再投6萬幼魚 包括青斑黃腳鱲包公
[2025.07.28] 發表
【明報專訊】為緩解三跑道工程對環境嘅影響，機管局2021年推行「敷設人工魚礁先導計劃」，喺機場南跑道以西水域敷設100座人工魚礁。到今年初，機管局喺中跑道以西水域增設500個人工魚礁，並於6月6號「全國放魚日」喺機場中、南跑道設有人工魚礁嘅範圍投放6萬條幼魚，包括青斑、黃腳鱲等品種，以及本地養殖嘅包公。
據機管局介紹，人工魚礁模擬天然珊瑚礁結構，酸鹼值亦調節到同海水相若，令海洋生物更易依附喺上面生長同寄居。至於投放嘅幼魚屬於原本棲息喺香港西部水域但數量開始下跌嘅品種，分別係青斑、黃腳鱲、黑鱲，以及中華白海豚鍾意獵食嘅白花魚，具生態重要性亦有助魚獲；另外有一萬條來自機管局「漁業提升基金」資助項目嘅包公。當日機管局並喺大嶼山沙螺灣、深屈灣投放約100萬隻蝦苗。
機管局話，2023年喺南跑道以西設有人工魚礁嘅範圍投放約2萬條幼魚。專家團隊監察6個月後記錄到部分幼魚體積增長，亦搵到17種魚類棲息喺人工魚礁上，包括細鱗、金鼓、火點、芝麻斑、黃斑同小丑魚等。
盼改善西部水域海洋生態
機管局首席可持續發展主管李仲騰話，機管局至今已敷設600個人工魚礁，投放近9萬條幼魚；機管局會監察海洋生物喺人工魚礁棲息嘅情况，為期12個月，亦計劃未來幾年再投放兩次幼魚，以改善西部水域海洋生態。
更多港聞
【Emily】距奧運3年 曾俊華盼師弟蔡俊彥唞吓先
【明報專訊】27歲港隊劍擊名將蔡俊彥（Ryan）早前喺劍擊世界賽奪金寫港隊歷史，喺國際劍擊總會（FIE）公布嘅最新世界排名躍升「世一」。前財... 詳情
【Emily】專頁惡搞整AI圖 葉太轉載讚「sweet」
【明報專訊】新民黨立法會議員葉劉淑儀一向都係網上談論嘅熱門人物，社交媒體甚至有專頁關注佢及出惡搞圖文。葉太噚日就喺社交媒體轉貼「我老公娶咗葉... 詳情
相關新聞
