【Emily】8退役現役巴士 下周六巡遊賀國慶

[2024.10.11] 發表

【明報專訊】國慶雖然已過咗，但慶祝活動就未完。運輸署噚日公布下周六(19日)舉行慶祝國慶75周年巴士巡遊，由專營巴士公司派出8架退役同現役巴士，包括以國慶75周年為主題嘅開篷巴士領頭車，仲有城巴復古「大食鬼」同純電動雙層巴士、九巴嘅「長牛」同「密龍」、新大嶼山巴士復古「勝利二型」等都會參與。

車隊會由維園出發，途經歌頓道、英皇道、高士威道、軒尼詩道、菲林明道同龍和道，終點係中環民光街，全程約6公里，預計歷時約30分鐘。運輸署話市民可以沿途觀賞，建議最佳位置包括銅鑼灣軒尼詩道近渣甸街、灣仔金紫荊廣場同中環碼頭。

當日會由警方引領巡遊車隊。運輸署提醒，會視乎交通同人流情况，實施合適交通同人流管理措施，呼籲沿途觀賞嘅市民及駕駛者遵從現場警員指示，同埋留意最新交通消息。如果當日天氣惡劣，基於安全考慮就會取消巡遊。

更多港聞

【明報專訊】飲食及酒店業界早前推出一系列國慶優惠，飲食界立法會議員張宇人噚日同業界總結情况，話有連鎖餅店銷售額有雙位數增長，又大讚優惠唔止「... 詳情