【Emily】飲食業國慶優惠見效 張宇人倡下年早啲宣傳
[2024.10.11] 發表
【明報專訊】飲食及酒店業界早前推出一系列國慶優惠，飲食界立法會議員張宇人噚日同業界總結情况，話有連鎖餅店銷售額有雙位數增長，又大讚優惠唔止「平靚正」，而係「平平靚正」，估計國慶期間有市民因為抵食抵買而放棄北上，留港消費。
同場一間連鎖酒樓嘅代表就話今次國慶消費較以往熱烈，另有連鎖食肆代表話客人滿意優惠活動，食客更願意嗌平日唔捨得食嘅菜式。
亦有業界話，好多內地客來到香港先發覺有折扣。張宇人就話今次太遲公布優惠詳情，未有足夠時間宣傳，明年會早啲公布國慶優惠。佢又建議傳媒明年多啲報道國慶優惠，希望出年有更多內地、東南亞以至美加華僑喺國慶期間來港旅遊。佢又強調業界推優惠係為慶祝國慶，唔係只為生意，暫時無計劃推出聖誕優惠。
更多港聞
相關新聞
