【Emily】立會唞暑放大假 3外訪團「撞地點」
[2024.06.22] 發表
【明報專訊】立法會下月中起休會「放暑假」，至10月中先至復會，有議員會抽時間同屋企人外遊唞唞，但同時會安排唔少外訪同公務活動，當中包括立法會各事務委員會安排嘅外訪團，暫時所見，已經有3個事務委員會「撞地點」，8月、9月分別去蘇浙一帶。
教育事務委員會將會喺8月12日至15日去上海及江浙訪問，探討範疇同考察嘅地方包括位於上海閔行區嘅科技企業園區「大零號灣」，以及當地嘅愛國主義教育基地、職專教育同資優教育等。食物安全及環境衛生事務委員會就喺8月21日至24日去江蘇省南京市及周邊城市訪問，初步計劃拜訪相關政府機構，了解食品安全監管、對出入境食品監督嘅管理、制定及執行城市管理和市容管理嘅政策、當地推動漁農業現代化經驗等，又會考察相關企業。
噚日交通事務委員會都討論到外訪團嘅安排，委員會計劃9月10日至13日去上海、蘇州同杭州，考察主題圍繞新能源汽車、自動駕駛、網約車及智慧交通管理等，仲會邀請埋相關官員及非委員會成員嘅議員參加。
更多港聞
【Emily】模擬大型活動散場潮 啓德站重大事故演習
【明報專訊】明年上半年啟用嘅啟德體育園預計會舉辦唔少大型活動，包括明年11月全運會嘅部分項目。警務處等多個部門噚日凌晨喺港鐵啟德站進行跨部門... 詳情
相關新聞
