【Emily】孫玉菡上門游說無效 田北辰講明倡加虐兒知情不報罰則
[2024.06.20] 發表
【明報專訊】政府早排就《強制舉報虐待兒童條例草案》修訂，包括設立「兩級制」、新增豁免同免責條文，指明「情節惡劣」嘅知情不報專業人員先要判監，最高監禁3個月。實政圓桌田北辰批評過監禁刑罰太低，話要提出修訂，加重到要監禁一年。勞福局長孫玉菡噚日就親自上門向田二少講解。田二少話，局長有游說佢唔好提出修訂，話立法會法案委員會嘅議員本身對設立監禁期已好有保留，政府「好努力」先保留到有3個月罰則。
田二少話，覺得局長好似都係搞唔掂業界，佢自己就仍然認為如果最高罰則繼續係3個月，最終判刑可能只係判一兩日甚至毋須監禁，阻嚇力唔夠，「做咗等於冇做」。佢決定喺立法會大會恢復二讀嗰陣提出修正案，將最高罰則提升到監禁一年。
雖然二人最後無共識，但田北辰強調係「和而不同」，讚賞局長努力溝通，大家都能清楚對方嘅立場。
更多港聞
【明報專訊】舊年本港發生跳彈牀意外，兩個少年受傷。民建聯議員梁熙噚日喺立法會口頭質詢，關注會唔會加強規管彈牀遊樂場，包括設立發牌制度。多個議...
詳情
相關新聞
