【Emily】立選活動拉「人代票」？ 黃錦良：職員搞錯
[2022.12.02] 發表
【明報專訊】今個月有兩場選舉，包括立法會補選以及港區人大代表選舉。噚日教聯會搞咗個見面會，安排一批教育界及創科界選委到場，同6名參加立法會補選嘅候選人交流，同場仲有參選人大選舉嘅教聯會主席黃錦良校長。
呢個活動雖然寫住係人大及立法會選舉候選人交流會，但黃校長澄清，應該係職員搞錯咗，其實佢只係在場做主持，呢項活動係選委同立法會候選人交流，佢本身喺教育界，台下全部係界別嘅朋友，唔使喺呢個場合拉票選人大。
立法會補選18日投票，而人大就喺15日投票。立法會補選有6名候選人，分別係黃錦輝、陳永光、何敬康、黃梓謙、尚海龍和李廣宇。黃校長話，選委喺會上表達關注學生人口下降，學校面對殺校嘅問題，亦好大興趣想知道，候選人對點樣推動創科及吸引人才嘅睇法。佢又話大家教育界，亦關心點樣培養學生正確價值觀。
更多港聞
相關新聞
