【Emily】3議員校友訪教大 見識「未來教室」
[2022.08.16] 發表
【明報專訊】身兼立法會選委會界別議員嘅3名香港教育大學校友林振昇、郭玲麗同陸瀚民，獲校長張仁良邀請，噚日返母校敘舊、同學生代表食飯，以及參觀校園設施。
3名議員校友讀書時教大未升格，仲係香港教育學院，噚日佢哋見到唔少新設施，包括「未來教室」，入面嘅VR CAVE教學系統，設有360度四面及地面互動式投影裝置，3人戴上3D眼鏡，體驗點樣用科技結合教育，提升學習效能，又喺模擬沙灘嘅場景體驗「掃垃圾」。佢哋仲參觀咗教大即將動工嘅新教學大樓項目，料2025/26年度建成。
培育領袖 城大再推「老虎班」
另一邊廂，城市大學第二年推行「HK TECH老虎班」計劃，畀成績好嘅學生發揮潛能、培育佢哋成為未來科創領袖。學生有機會攻讀雙學位課程、喺城大及海外伙伴大學完成本科課程，例如美國哥倫比亞大學，或喺第四學年修讀修課式碩士課程等。學員分三類，其中包括入學成績優異新生，但城大今年要求提高咗，文憑試(DSE)「4+2」(4科主科及兩科選修科)成績由上學年要求嘅28分或以上提高到30分，而IB就由考獲38分或以上提高到40分。
更多港聞
【Emily】將專責人力資源財務管理培訓 王學玲任律政司政務專員
【明報專訊】政府噚日宣布，現任「財政預算案及稅務政策組」主任王學玲（圖），將於8月22日出任律政司政務專員，專責律政司內部人力資源、財務管理... 詳情
【Emily】「活出不一樣的50+」 方國珊讀工程碩士
【明報專訊】新學年9月開學在即，今年56歲嘅「哪吒」、西貢區議員方國珊都會開學。原來佢報讀咗理工大學嘅工程碩士課程，佢話慶幸能夠「活到老，學... 詳情相關新聞
