【明報專訊】最近有好多建制派人士一落區都被街坊圍住鬧，而政府未能止暴制亂之餘，民生政策似乎亦未能挽回人心，連建制派都好不滿。民建聯主席李慧琼(Starry)噚日就喺立法會大會上「爆seed」批評政府，要求政府除咗要止暴制亂外，「每一個官員都要帶頭改革」。 立法會傾咗兩個星期都仲未表決到稅務寬免嘅修訂條例草案，好多建制派都借題發揮，批評政府無法保護市民，話單純稅務寬免根本唔可以幫到市民。Starry發言時就話啲官員有權，但就唔需要面對市民嘅投訴，只係坐喺議會聽議員發言，聽完都係繼續以行政考慮去處事，根本無新思維。佢呼籲「每一個官員都要帶頭改革」，又希望官員可以主動了解市民有咩需要幫。 李批官員無新思維 工聯會麥美娟(Alice)直斥政府「黐線」，話中銀香港被示威者破壞，要自救用鐵板封住分行，但地政處竟然話係僭建，「係咪黐線……你保護唔到間銀行……佢去自救，你竟然話佢僭建」。佢反問政府啲商店係咪要日日打開門「繼續畀人打我」，要求政府再檢視法例保護市民。 噚日嘅立法會會議提早下晝6點前就結束，立法會主席梁君彥話立法會一帶或有示威，為免影響議員同職員，所以提早兩個鐘完會。 Starry同Alice都有參選區選，Starry對手係社民連梁國雄；Alice對手為公民黨冼豪輝。
|
| |
| |
;)
