【明報專訊】今屆區選有唔少素人出戰，但亦有人被指有「𠝹票」之嫌，其中參選深水埗「南山、大坑東及大坑西」選區、任職多媒體製作人嘅徐駿楠，就被指曾任經民聯立法會議員梁美芬嘅助理；佢喺自己嘅宣傳品上就強調要「堅守五大訴求」，政綱包括爭取成立獨立調查委員會、徹查所有濫暴事件、跟進被捕者情况等。 不過，唔少網民就留言，並貼出徐駿楠曾經同梁美芬同場嘅照片，又指現任區議員、民協譚國僑已經係民主派，點解佢要去「𠝹票」。 話離開建制後冇做違背良心事 對於網民質疑，徐駿楠澄清，話約8、9年前喺建制派陣營工作，佢唔會逃避亦唔會隱瞞，亦深明會變成被攻擊嘅材料，但自離開建制派後並冇做過違背良心嘅事，每個運動都積極表達抗爭立場，「若果你曾經為一間中資公司工作，因政見不合而辭職，難道你就一生就不能為香港人做點事？」 對於選擇嘅區本身已經係泛民出任區議員，徐駿楠話自己確實聽到居民希望有多一個選擇，又話譚國僑服務社區多年，相信對方以往堅固嘅選民基礎唔會受影響，形容大家嘅支持者根本不同，好嘅政治制度理應容納更多不同聲音，強調無諗過𠝹票，因為決定取決於選民意願。 當區其他參選人包括陳麗紅，以及報稱獨立民主派嘅陳炳輝。
|
| |
| |
;){kind=small}
;)
