【明報專訊】反修例運動下，民主派期望11月區議會選舉可以搶到多啲議席，但喺非建制陣營撞區爭位未解決。區選提名期下月開始，民主黨劉青就同「沙田區政」謝潔泳喺沙田嘅「帝怡」撞區，有自稱「選民」電郵民主黨新界東支部，話觀察到謝潔泳做得好啲，叫民主黨「放下自利，顧全大局，退出帝怡」。 有參與協調嘅民主黨北區區議員陳旭明就話，地區工作做得好唔好，其實好主觀，佢覺得劉青都做得好好。佢又話，民主黨早過沙田區政同「民主動力」講，嗰區會派人落，希望大家尊重民主動力嘅協調機制。 民主黨：早過沙田區政開聲落區 應尊重協調機制 陳旭明噚日同Emily講，民主黨喺上年10月9日已通知民動，會派人出選「帝怡」，只係當時未有人名，之後沙田區政先同民動講，佢哋都有人落。陳強調，最緊要係尊重民主動力機制，佢話喺民動協調嗰陣，最先係民主黨同工黨協調，但由於民主黨將馬鞍山市中心讓畀工黨，後來工黨又讓番「帝怡」畀民主黨。 陳旭明話，沙田區政一早知有民主派政黨落戶帝怡，反問「點解唔喺開展地區工作前，大家傾一傾」；又強調如果民主黨跟足民主動力機制協調，但最後要讓個區出去，就會變成先例，其他區就會跟住出現呢啲爭拗。
|
| |
| |
;)
