【明報專訊】建制派愈來愈重視網上宣傳，喺佢哋眼中民生無小事，區內嘅渠蓋、天橋太滑，容易令居民跣腳，佢哋都關注，民建聯噚日就用愛情故事去宣傳，希望政府關注吓中西區內幾個跣腳嘅地方，盡快做改善措施。

條片融入愛情元素，由相信下年都好大機會參選區議會嘅社區主任做「愛的故事」主角；短片中，社區主任張嘉恩喺渠蓋同天橋上跣親嘅兩段情節，就分別由莫淦森、施永泰兩個社區主任飾演守護佢不至跌倒嘅男仔，似乎呢個愛情故事都有啲複雜喎。

民建聯形容短片係「中西區愛的故事—『跣』情上映」，指現實生活其實無咁多男神「飛身撲救」，如果不幸跣腳，隨時受傷，中西區就出名多斜路同窄路，佢哋話渠蓋喺落雨後變得濕滑，試過有街坊跣倒後，個頭撞到後面渠蓋流血；而區內一條天橋，落雨後街坊亦容易跌倒，該黨早前就發起簽名要求政府改善，爭取鋪設防滑鋼砂。