【明報專訊】立法會放完暑假，財委會噚日開會選舉正副主席，保險界議員陳健波成功連任，之後佢要主持財會嘅副主席選舉。會計界議員梁繼昌(Kenneth)被提名，多位泛民舉手和議。唔知係咪放暑假放得太耐，波哥一度叫唔出和議者係民主黨尹兆堅，波哥講笑話，「我唔記得晒你哋啲名喇」。波哥事後話自己曾經叫錯尹兆堅個名3次，所以以後都要小心啲。 笑言自己主席做得好 波哥雖然擺咗個小烏龍，但似乎心情唔錯，未知關唔關建制派推舉嘅副主席候選人陳振英(Ronick)話，「虛心向波哥學習主持財會嘅學問」有關。民主派區諾軒問Ronick點為之公允嘅主持會議手法，波哥之後主動叫Kenneth答埋同一問題，但就將區諾軒條問題加料變成，「會唔會好似我做得咁好」，引來哄堂大笑。不過，新民主同盟范國威批評波哥主持選副主席唔夠認真。 另外，立法會喺暑假完成設施翻新工程，包括將會議室2嘅座位數目，由66個增加至84個。會議室2由2A和2B兩間房組成，中間以層板分隔，打通之後，成為會議室1同會議廳外，第3個可容納全體議員嘅房，第日若財會或大會出現混亂，都有多一個轉房開會嘅選擇。
|
| |
| |
;){kind=small}
;)
