【明報專訊】超強颱風「山竹」襲港時各紀律部隊努力救援，風災後亦自發動員做義工清理各區，消防處噚日出咗一條短片，感謝消防員其間緊守崗位、救災扶危。而消防處前日亦成立咗一個新部門，負責透過網上社交平台做宣傳教育，嚟緊市民會有更多機會收到消防處嘅資訊。 短片以「戮力同心 齊抗風災」為題，輯錄咗一幕幕消防救援片段。片中顯示一啲統計數字，「山竹」襲港期間，消防處錄得587次火警召喚、3768次救護服務，分別比上年「天鴿」來襲時增加接近1倍；特別服務有1241次，較「天鴿」時增逾兩倍。 消防安全總區前日成立咗「社區應急準備課(CEPD)」，一共有60人，負責宣傳同公眾教育。CEPD由一名新增嘅高級消防區長主管，據了解，呢名阿sir來自「跨部門反恐專責組」，嚟緊會透過唔同網上社交平台例如facebook、Instagram，加強市民應急準備意識，擴闊公眾教育網絡。而過去分別隸屬救護總區總部同消防安全總區支援課嘅「社區關係組」都會撥歸CEPD管理，以集中人手。
|
| |
| |
;)
