容海恩說話錦囊﹕最緊要動聽 如靚女吸睛
【明報專訊】由青少年領袖發展協會為中學生舉行嘅年度「模擬立法會」活動,噚日喺港大舉行閉幕禮,請嚟政黨領袖同官員主禮,有數十名中學生出席,部分學生向嘉賓解說暑假期間嘅學習同研究成果。新民黨立法會議員容海恩做評判評分時贈予錦囊,講笑話「presentation好緊要,有時內容反而無咁緊要」,仲話要講得動聽先可以吸引人聽,正如「靚女都畀人望多幾眼啦,啱唔啱呀?」容海恩無講口中嘅靚女係咪講緊自己,但現場學生聞言都隨即起哄。
公民黨主席梁家傑以短片分享政壇經驗時,唔點名話有啲人「由民主派過檔咗去建制派」,政壇日日都有嘢發生緊,學生參加模擬立法會時都有角色代入,「可能會知我講邊個」,引嚟現場一片笑聲,唔知梁家傑講緊嘅係邊個呢?
月初加入問責班子嘅政制及內地事務局副局長陳帥夫致辭時話,自己大學畢業後已加入政府,過去20年同立法會工作關係密切,形容立法會係相當豐富嘅組織,每屆立法會都有自己嘅特色,有如「永遠睇不完嘅一本書」,每個章節都相當精彩。