【明報專訊】特首候選人林鄭月娥日前出席民主思路選舉論壇，同對手胡國興首次同場辯論。林太噚日出席活動後被傳媒問到點睇自己表現，同有乜改善地方，佢話同事同朋友都讚佢表現唔錯，自己對工作同數字較熟悉，可能令人感覺較實在，仲話自己好希望3名候選人可以同場辯論。但被問到點解缺席民主派IT界選委名單「IT Vision」聽日舉行嘅論壇，林太就轉身離去無回應。 林太競選辦噚晚回覆Emily，話林太有其他行程所以無暇出席聽日嘅論壇，強調出席與否同主辦單位誰屬無關。「IT Vision」聽日安排候選人分開出席論壇，唔會同場辯論，曾俊華同胡國興已答允出席。 林太噚日亦喺facebook上載短片，分享出席首場論壇嘅感受，話可以詳細解釋施政理念同政綱之餘，亦可以回答尖銳問題，笑言「可以操fit一下自己」。 湯家驊向胡官致歉 另外，胡國興日前出席民主思路論壇後，話「唔知點解」總結發言嘅次序被臨場調轉。民主思路召集人湯家驊噚日喺facebook致歉，話出錯係因工作人員出現內部溝通問題，向胡官致歉，希望對方接受。
|
| |
| |
;)
