【明報專訊】特首選舉參選人林鄭月娥之前接受電台節目訪問時，講過自己凡事都會親力親為，如果開facebook專頁都唔會搵人代筆。未知林太係咪因為忙於見各界選委，無暇打理fb，噚日「林鄭辦公室」專頁有post就由「小編」代為發文。「小編」問網民點睇的士加價兩蚊，呢個帖惹嚟唔少網民畀「嬲」，有網民講明「個嬲係畀林鄭月娥嘅」。 噚日「林鄭辦公室」先喺早上發帖，話天氣稍涼，叫大家記得添衣，注意保暖。林太咁貼心嘅提醒，得到1200個like，但「嬲嬲」亦有5000多個。林太仲喺帖中提到，自己繼續馬不停蹄，向唔同界別選委解釋施政理念。 而佢fb嘅「小編」就喺下午出動發文。「小編」問網民點睇的士加價(4月9日起市區的士起表由22蚊加到24蚊)，仲自我抽水話畀「心心」符號代表「要買廁紙咪搭囉」；而畀「嬲嬲」即係覺得「真係呃錢！回水啦！」。截至噚晚深夜，呢個帖有600個「like」、4000多個 「嬲嬲」；唔少網民以「嬲」樣留言，表明「個嬲係畀林鄭月娥嘅」；但都有網民留言支持林太做特首。 林太：會繼續學習 對於fb競選專頁多負評，林太噚日回應話，自己不善於用社交媒體，以前亦無建立專頁，但強調自己接受要學習同社會大眾、特別係年輕人溝通，唔應該「輕輕放過」社交媒體，所以會繼續學習。 另外，「住好啲」創辦人楊志超拍片支持林太，佢讚林太予人感覺好親切。
|
| |
| |
;){kind=small}
;)
