【明報專訊】立法會5名建制派議員(G5)噚日同傳媒新春聚會，召集人廖長江(Martin)係馬會董事，原來佢雞年有賭運，星期日賽馬佢同太太名下嘅「極品」幫佢贏咗頭馬。 不過，Martin話事前佢無估過可以拉頭馬，因為馬匹編喺14檔外排，賽前係冷門，佢自己都只係精神上支持自己，小賭落注200元，估唔到最終影相贏咗個半個馬鼻。 Martin雖係馬主，但話自己其實唔好賭，又話幾十年前睇相，已經畀相士批佢無橫財命，而自己以前打麻將被人叫「魚腩」同「站長」，所以都30幾年無打過牌。 G5議員：無赴深圳見領導 近日盛傳全國人大委員長張德江日前南下見建制派，所以G5議員都估到傳媒會追問佢哋，所以佢哋一坐底就先申報，話自己無去過深圳見領導人，等大家唔使嘥心機追問。 身兼人大代表嘅馬逢國就話，近排去咗外地，前日先返港，所以見領導一定無佢份。 馬逢國話呢排都會成日見到4個特首參選人，因為佢立法會界別有4組選民，加上佢有人大咁多唔同身分，各界別都要約4人見面，佢只能夠盡量去，否則最少要出席30幾場。
|
| |
| |
;){kind=small}
;)
