【明報專訊】特首梁振英(CY)任內最後一份《施政報告》，唔知係咪臨別秋波，CY格外「長氣」，報告中文版有279段共29,460字，比2016年嗰份長咗11%。佢噚日朝11點去立法會宣讀，讀到大概12點半左右，安排咗一個10分鐘break，等議員離開一陣唞唞氣，結果成份施政報告搞到近下晝1時半先讀完！ 朝早11點讀到1點半 CY沿用橙色做報告主色調，正面加咗一張陽光燦爛嘅維港風景相(圖)，係政府新聞處航拍相，佢話維港日景壯麗、夜景璀璨，標誌一代又一代香港人務實、進取嘅奮鬥成果。據知呢張相以前都喺CY個blog登過，今次係循環再用。政府中人同Emily講，今次嘅引言同結語部分由CY親自執筆，但筆鋒都無流露太多個人情感，結語重申當年上任時提到「迎難而上」四個字，話不僅代表佢嘅「初心」，亦係香港人建設香港呢個家嘅體會，而「難」就說明佢對問題嘅認識，「上」就代表咗佢哋嘅決心和行動。 CY結尾話「我競選政綱的承諾基本上已經全部落實」，係咪咁就見仁見智，而佢就話要感謝官員、議員及市民等各界支持。施政報告厚咗，但政府都想慳少少紙，中文版印咗2.87萬本、英文版1.82萬本，印量分別減少咗9%及15%，花咗80萬元印費，而介紹政策工作嘅施政綱領書冊，就用咗64萬元。
|
| |
| |
;){kind=small}
;)
