【明報專訊】屬會會員人數超過20萬嘅新界社團聯會(新社聯)，噚日舉行成立31周年會慶酒會，特首梁振英及兩名「得力助手」政務司長林鄭月娥、財政司長曾俊華，以及多名局長都畀面支持；中聯辦副主任林武同法律部長王振民等亦賞面，鄉議局主席劉業強則同一眾建制政黨高層現身祝賀。 歌詞形容「燃起我們和平希望」 全國人大委員長張德江上月訪港大談一帶一路，新社聯曾經為一帶一路創作同名歌曲，噚日就向在場人士派發歌曲CD，更搵嚟幾個歌手演唱。呢首歌好唔好聽見仁見智，但就肯定緊跟中央路線，歌詞形容一帶「燃起我們和平希望」、「是東西溝通橋樑」，一路就「穿越風浪跨過海洋」、「各民族各顯所長」，如果委員長聽到，唔知會唔會為新社聯加分呢？ 立法會選舉臨近，新社聯會長梁志祥致辭時引用張德江說話，指香港亂、大家就要「買單」，故新社聯支持更多愛國愛港人士進入議會。林鄭月娥發言時不忘一帶一路，話香港要捉緊良機，令經濟繼續穩步發展同為國家作貢獻，相信新社聯喺呢方面會繼續發揮影響力，幫政府深化工作。
|
| |
| |
;){kind=small}
;)
