【明報專訊】立法會功能組別「建築、測量、都市規劃及園境界」一向多人垂青，民主黨兼公專聯吳永輝(圖)，以及親泛民嘅中大副教授姚松炎早前都表明有意參選，有消息仲話泛民近日探討緊初選嘅可能，協調一人出選，集中力量挑戰建制派。點知二人前晚見面講數後，吳永輝噚日突然發聲明宣布唔會參選。吳永輝話，既然姚松炎去意堅決，佢願意退選讓「姚」，但吳就話「感覺無奈」。 至於吳永輝會唔會幫姚松炎站台拉票？吳永輝同Emily講，要視乎姚嘅政綱同政治取態。姚松炎就話﹕「如果出選，應會邀請永輝協助。」 吳永輝曾屢敗屢戰，以往獨力喺界別抗衡建制派，雖然未曾成功，但吳由2004年只得527票、2008年712票，到2012年已獲1464票。而現任議員係測量師謝偉銓。 吳永輝喺聲明中提到「自信有勝算機會」，得悉姚松炎會參選，亦曾主動聯絡協調；但最後姚松炎堅持參選，無意退讓，「對此，永輝感覺無奈」。吳強調民主力量只宜忍讓和團結，要以民主大局為重，又話自身工作繁忙，事業略有成績，故願意退選，避免民主派分票，令建制陣營漁人得利。吳今次讓路，除咗佢自己，唔少民主黨兄弟都感到無奈。 泛民一方總算傾掂數，𠵱家就睇吓建制一方會點搞，現時謝偉銓有意爭取連任，而建築師學會前會長林雲峰亦積極備戰，如果建制未能協調，今年又可能會出現兩個建制對一個泛民嘅局面。
|
| |
| |
;){kind=small}
;)
