想媽媽見證畢業 劉鳴煒去加國跳級讀書
[2016.05.14] 發表
【明報專訊】被稱為「Package劉」嘅青年事務委員會主席劉鳴煒，久唔久都上電台節目講吓青年事務同埋時政，不過佢噚日就少有地講到自己私人生活。雖然含住金鎖匙出世，但劉鳴煒細個嗰陣爸爸劉鑾雄同媽媽寶詠琴離異，佢話無怨恨過佢哋離婚決定，仲話自己都離過婚，明白離婚對父母同仔女都唔好，不過感情嘅事無可避免，亦唔會對父母有怨恨。
唔刻意干預大劉私生活
大劉嘅私生活成日都係傳媒焦點，劉鳴煒接受商台《雲常開》訪問話，社會自由開放，爸爸點生活係佢個人嘅事，但如果事件直接損害到父親或者佢自己，「出句聲都應該」。他仲話有試過講出口提醒，但如果無改變，就唔應該刻意干預。
佢透露，自己16歲去到加拿大讀書原來唔係為咗玩，1994年寶詠琴癌症復發，佢因為想確保媽媽可以睇到自己畢業，所以去加拿大「跳級一年」讀書，希望縮短畢業年期，仲話如果有機會，希望同媽媽講「我愛你」。
劉鳴煒曾經因為講過「年輕人去少啲日本、睇少啲戲儲錢買樓」而畀人批評「離地」，佢話唔介意人哋標籤，仲話自己衣著樸素、無揸名車，唔係因覺得「對唔住社會」而刻意咁做，「我根本就鍾意咁樣生活」。
更多港聞
相關新聞
