告別北角碼頭巴士站
[2016.05.14] 發表
【明報專訊】有58年歷史嘅北角碼頭巴士總站終於完成歷史使命，今朝5點開始，新巴同城巴共13條路線全部搬到隔離嘅新北角渡輪碼頭公共運輸交匯處。唔少市民噚日專程到呢個巴士總站影相留住最後一刻，有巴士迷喺facebook開專頁，約好噚晚8點半到場，向呢個巴士站告別，亦有家長陪同仔女嚟到懷緬一番，就連巴士車長都爭取機會拍照留念。巴士站旁邊有個圓形嘅車長休息室，有巴士車長話由中巴時代用到𠵱家，對要拆卸覺得好可惜。
根據新巴及城巴網頁，最後一班由北角碼頭總站開出嘅巴士係新巴82號線，由北角碼頭開到小西灣，凌晨零時40分開出。至於最後一班埋站嘅巴士線就係城巴嘅10號線，凌晨1點05分由西環堅尼地城開出，大約凌晨2點到站。
更多港聞
相關新聞
