【明報專訊】電動方程式(Formula E)錦標賽香港站會於10月9日喺中環舉行，估計會推出4萬幾張門票，售價仲傾緊，最貴嘅賣成過萬蚊，可以同車手近距離接觸，最平門票希望可平過香港迪士尼票價(成人門票539蚊)，吸引一家大細入場。 Formula Electric Racing(Hong Kong)Limited 行政總裁方仁杰(圖)話，貴賓票可入去起點位置嘅Emotion Club，有嘢食，又睇到車手，而看台票可去唔同彎位嘅看台，睇到掟彎，最平嘅普通票就會大眾化，畀市民喺eVillage玩模擬香港賽道嘅電動車，但就未必睇到賽道，只可以睇大電視。 該公司市場推廣總監姜健恩話，貴賓票約有2000張，每張過萬蚊，而看台票則有1萬張，每張過1000蚊，普通票有3萬張，每張大約幾百元，相信會平過香港迪士尼，但實際價錢待定。 香港站賽道長兩公里，有10個彎，途經中環碼頭、摩天輪、IFC等，方仁杰話若果能夠搞夜賽，有維港夜景，一定好靚，但第一次喺香港比賽，要顧安全，所以先搞日間賽。 同方賽式賽車要中途入油唔同，方仁杰指電動車約跑30至50圈，中途無得叉電，無電就要換車，而公眾可以玩Fan Boost，最多人like嘅車手就可以喺比賽中途額外加電。
|
| |
| |
;){kind=small}
;)
