【明報專訊】參加今日閱兵同文藝晚會嘅香港觀禮團噚日陸續到達北京，擔任香港團「顧問」嘅中聯辦主任張曉明亦同香港團入住同一酒店，佢一出現引嚟大批記者追訪，大家問佢特首梁振英噚日中午係咪去咗港澳辦，張曉明就話「對」，雖然佢都行得好趕，無停低回應記者提問，但過咗一陣，佢又突然坐喺大堂，罕有咁話同大家坐低傾吓偈，但條件係唔好拍攝。不過佢講唔夠兩分鐘就話要走，原來佢落嚟係要迎接香港團嘅抗日老兵。張主任臨別時不忘幽默，同Emily等一眾行家講希望「大家手下留情」。

李澤楷問5點半邊度食早餐

北京名人雲集，好似李澤楷等，噚日率先到達酒店報到，佢最關心嘅，係問職員今日凌晨5點半嘅早餐可以喺邊度食呢？睇閱兵嘅嘉賓，大清早就要由酒店出發去會場等，要搞到中午先睇完，相信大家都好關注，到時頂唔頂得順咁多個鐘！

人大常委范徐麗泰同基本法委員會副主任梁愛詩，原本屬於人大觀禮團，但噚日亦突然現身香港團入住嘅地方，范太話佢同詩姐都突然被編配嚟香港團，原因係點就唔知喇。

晚會保安嚴 禁帶電話相機

而各觀禮團成員噚日就話，獲通知佢哋要帶齊4個證件，包括身分證、閱兵邀請函等入去，即使係坐旅遊巴，大會亦已幫佢哋編排好座位。

至於夜晚嘅文藝晚會，更加連電話、相機同袋都唔可以帶，咁搞法，龍友曾蔭權應該唔可以拎支長鏡去影相咯。