【明報專訊】有「教育沙皇」之稱嘅行政會議成員李國章,加入香港大學校務委員會啱啱一個月。港大教師及職員會就做咗一個調查,派咗466份問卷,收番152份。結果顯示,有85%受訪者冇信心李國章入校委會對港大有好處,另外之前傳話李國章會接港大校委會主席梁智鴻班,做埋主席,調查就反映有87%受訪者冇信心李國章做校委會主席對大學有益。
該會主席張星煒話,寄咗調查結果畀校監梁振英,話畀佢知委任李國章入校委會係非常唔適當嘅做法,亦希望李國章見到個結果後主動辭職。
李國章本身係醫學學者,佢之前喺明珠台節目《清心直說》批評部分教授「捨易取難」,接受訪問,而唔做研究同計劃書。
港大法律學院教授陳文敏就反擊話,科學同醫學研究講求寫計劃書同喺實驗室做實驗,但文學、人文、社會科學科嘅本質唔同,教員參與社會事務係關鍵,社區就係實驗室,如果大學教員匿埋嚟寫學術計劃書、唔關心社會,大學就會變番做象牙塔,履行唔到職責。