【Emily】廟街夜市延長半年 次輪宣傳再搵尹光
[2024.04.20] 發表
【明報專訊】旅發局去年12月中喺廟街設置夜市攤檔同打卡藝術裝置，噚日宣布項目延長半年，至今年12月，同時推出第二輪宣傳，再次邀請「廟街歌王」尹光做宣傳，重製佢經典歌曲《廟街》嘅MV。
喺MV入面，尹光同一班外國遊客喺街上嘅大牌檔歎啤酒、去夜市攤檔「掃街」，旅發局話希望透過佢嘅「標誌歌聲」，令市民同遊客重新探索廟街夜市。旅發局又話會將現有傳統特色燈籠裝置，由夜市範圍擴展到整條廟街，整排燈籠長約300米，夜市亦增開手打檸檬茶同小食兩個攤檔。
旅發局總幹事程鼎一話，截至今年4月有超過150萬旅客同市民到訪廟街，希望新一輪宣傳同延長營運期，以「人氣」產生更多「財氣」。
更多港聞
相關新聞
