【Emily】林健鋒生日飯局變「討論生育飯局」
[2023.10.21] 發表
【明報專訊】經民聯立法會議員林健鋒喺23號生日，黨友噚日提早同佢慶祝72歲生辰。林健鋒被問到有乜生日願望時，梁君彥即插嘴話「佢想攞2萬元。打孖係咪4萬元？」林健鋒話，如果政府真係如傳聞所講，鼓勵生育派2萬元，佢自己應該用唔着，但期望佢個仔可以用到。
一班經民聯男議員，生日飯局變咗討論「生育飯局」。林健鋒話陳祖恒已有4個仔女，爆料話陳想生夠10個，攞政府津貼。龍漢標亦抽水話，陳祖恒呢位生產力促進局主席係實至名歸。
一班黨友同林健鋒一齊切蛋糕，林健鋒就仿效龍漢標日前開會咁唱番幾句，選唱羅文嘅《幾許風雨》，話近年香港雖面對急風大雨，但就算遇上500年一遇嘅大雨，香港總算安然度過，佢話願望同蛋糕上寫嘅字句「鋒調雨順」一樣，希望下周三特首發表嘅《施政報告》，不單止樓市撤辣，更期望有措施刺激經濟，令香港有「水」。
更多港聞
【Emily】「香港自然十景」評選 萬宜柱石第一
【明報專訊】團結香港基金成立嘅香港地方志中心為配合《香港志》出版，早前舉辦「香港自然十景評選」，由市民、旅客經網上選出最能代表香港嘅自然景觀... 詳情
【Emily】何永賢做「熒光瑜伽」 撐屋邨夜繽紛
【明報專訊】房屋局長何永賢（中）噚晚到九龍灣啟業運動場出席「螢光城市探索啟動禮」，著熒光粉紅上衣嘅佢同參加者一齊戴住熒光手環做瑜伽。除咗落場... 詳情相關新聞
