【Emily】律政司開科技罪行科 周天行做主管
[2023.07.26] 發表
【明報專訊】專責反修例案件嘅律政司「特別職務組」今年5月因為內部人事調整而「消失」。Emily最近睇番政府電話簿同律政司架構圖，原來律政司增加咗針對「科技罪行」嘅新分科，由原本隸屬「特別職務組」嘅副刑事檢控專員周天行做主管，負責網絡恐怖主義、起底等罪行。周天行𠵱家係「35+」初選案嘅主控，過往處理唔少國安法案件。
初選案主控 處理起底等罪
律政司副司長張國鈞早前喺網誌話，2022年錄得兩萬幾宗科技罪行，較前一年上升四成，律政司刑事檢控科成立專責隊伍應對科技罪行，係刻不容緩嘅工作。
張國鈞又話，「科技罪行」分科會專責處理網上詐騙、網絡攻擊同網絡恐怖主義等罪行，亦會制訂檢控政策。
另外，立法會財務委員會今個月初通過開設首席政府律師嘅職位，以率領新分科打擊科技罪行。
更多港聞
【明報專訊】立法會噚日邀請公眾就中大校董會改組嘅條例草案表達意見，有興趣嘅人或團體可以喺下星期一（31日）下晝5點或之前提交網上表格同意見書...
詳情
相關新聞
