【Emily】懲署「暖男廚房」 鄧炳強做大廚幫手 為家人煮聖誕餐 少年犯哽咽

懲教署安排青少年犯同家人同枱食嘢團聚，其中一名在囚者（右一）話好開心媽媽（左一）坐喺佢面前，唔使隔住鐵窗溝通，又話好對唔住媽媽，又多謝媽媽一直嘅支持。保安局長鄧炳強（左二）及懲教署長黃國興（右二）見證住呢一刻。（片段截圖）

懲教署喺聖誕節期間安排在囚者參與聖誕節活動，天主教香港教區主教周守仁（中）噚日就到赤柱監獄主持聖誕彌撒。（政府新聞處）

特首李家超（中）著咗紅黑間條衫，配合聖誕節氣氛。佢同太太林麗嬋（前左）噚日喺禮賓府接待一班青少年，共賀聖誕。（李家超facebook圖片）

【明報專訊】聖誕節普天同慶，但有一班在囚青少年未能同家人歡聚，懲教署本月19日推出「友晴Teen使」計劃，頭炮活動係喺壁屋懲教所舉辦「暖男廚房」活動，安排青少犯拍片，煮聖誕餐畀家人享用。片段見到，懲教署安排青少年犯同家人一齊同枱食嘢團聚，其中一名囚友向媽媽公開認錯訴心聲。呢名青少年對住媽媽講嘢時忍唔住哽咽，話好對唔住媽媽，因為自己之前唔成熟同衝動，令媽媽同自己一齊承擔後果，亦多謝媽媽一直嘅支持，就算有傷病，都堅持去院舍探佢。

懲教署噚日喺facebook上載短片，呢次由保安局長鄧炳強化身大廚，同6名青少年在囚者炮製漢堡包同梳乎厘(取其「在乎你」之意)予家人享用，畀佢哋同家人食嘢相聚，亦希望成為佢哋改過自新嘅動力，當日仲有懲教署長黃國興客串做「店長」。

主教周守仁監獄主持彌撒

天主教香港教區主教周守仁噚日去咗赤柱監獄主持聖誕彌撒，向在囚者分享信仰哲理同送上聖誕祝福。聖公會大主教陳謳明就喺22日到白沙灣懲教所主持聖誕崇拜，向在囚者講道及分享宗教信息。

政府及相關機構噚日都有辦聖誕活動。特首李家超就同太太林麗嬋，邀請咗一班喺第14屆香港盃外交知識競賽獲獎隊伍嘅學生，同埋兒童發展配對基金頌歌隊嘅青少年參觀禮賓府。頌歌隊學生仲帶領大家一齊唱聖誕歌。

另外，醫管局安排聖誕老人去大口環根德公爵夫人兒童醫院派禮物；香港兒童醫院就安排與小朋友和家人一同唱聖誕歌活動。

更多港聞

【Emily】霓虹招牌聖誕卡 團體籲毋忘「香港之光」

【明報專訊】噚日聖誕節，有保育團體設計咗一張電子聖誕卡，並以本港昔日著名嘅霓虹招牌為靈感，務求喺送上祝福嘅同時，透過聖誕卡令大家反思同留意寥... 詳情

【Emily】IT狗導演：將有更多類似《正義迴廊》作品

【明報專訊】前財政司長曾俊華早排客串過ViuTV電視劇《IT狗》，佢噚日喺facebook話有日飲咖啡時撞到該劇導演簡君晉（Lawrence... 詳情