【Emily】中大創新日展科研成果 AI睇實BB瞓覺
【明報專訊】中大噚日舉行「第二屆中大創新日暨電梯募投大賽」,展示好多中大學者嘅科研成果,其中中大信息工程學系教授刑國良嘅團隊研發嘅「智能嬰兒呼吸監測系統」,可以透過紅外線鏡頭監測嬰兒瞓覺時嘅呼吸頻率,同時運用AI,自動追蹤嬰兒睡姿,睇到佢哋口、鼻有冇畀物件遮蓋,減低猝死嘅風險。
近年有唔少研究發現,市面上好多防曬用品含有令珊瑚白化嘅化學物質,而中大化學系教授魏濤嘅團隊研發嘅新型物理紫外線阻隔物料,不含微塑料,亦有別於一般防曬產品會加入化學或物理防曬因子。魏濤話,呢種新阻隔物料唔止防曬系數高、黏膩感低,更重要係唔會污染海洋環境。
中大計算機科學與工程學系教授王平安嘅團隊,就推出配合手機軟件使用嘅可穿戴式感應器,物理治療師透過感應器可以了解患者嘅康復程度,制定合適嘅復康訓練。
中大今年仲第一次搞「電梯募投」大賽,13間中大科技初創企業資助計劃(TSSSU)轄下嘅公司,各有兩分鐘介紹最新科研成果,爭4個獎項。