【Emily】議員問合約責任豁免 徐德義：唔識答

【Emily】議員問合約責任豁免徐德義：唔識答

[2022.03.16] 發表

【明報專訊】政府先前動用緊急法，容許政府豁免某啲參與抗疫工作嘅人嘅註冊或牌照要求。本身係律師嘅選委會界別議員簡慧敏噚日喺立法會審議呢條附屬法例嘅視像會議上問政府當局，會唔會擴闊至豁免埋相應嘅合約責任。簡慧敏舉例，政府雖然豁免咗中央派畀香港嘅連花清瘟膠囊等3隻中成藥嘅入口要求，但可唔可以放寬埋代理商入口呢幾隻藥，免除後續麻煩呢？

點知呢個豁免合同問題考起食衛局副局長徐德義，佢一面無奈話：「唔好意思，我確實唔係法律專才，我無辦法答呢個法律問題。」在場嘅律政司律師亦話要再研究先得。

居家隔離者將可免費中醫遙距診症

講番中藥治療，徐副局就答得比較審慎，佢話雖然感謝民間送藥，但始終中成藥都係藥，要小心處理，確保品質同埋安全，當局跟進緊進口香港及市面銷售情况，要多啲時間從長計議。

徐德義又透露，政府將會喺中醫藥發展基金下推出支援計劃，向居家隔離嘅確診者提供一次免費中醫遙距診症服務及免費送藥，首階段預計兩萬人受惠，如果效果好，往後可再繼續。