【Emily】高官續谷票 徐英偉扮候選人籲投票
[2021.12.13] 發表
【明報專訊】政府高層指示，高官們要一齊催谷投票，民政事務局長徐英偉噚日就喺社交媒體出Post，圖片格式十足十候選人海報(圖)，唔講仲以為係佢自己參選嘅宣傳品。徐英偉仲留言話，12月19日立法會換屆選舉日倒數一星期，「我徐英偉，決定要選?擇?提醒大家，記得去投票呀！ 」
其他司局長都透過出席活動或網誌時宣傳選舉。食物及衛生局長陳肇始喺網誌就話，提高議會同特區政府管治效能，就可以畀食衛局順利推展工作，話尤其面對新冠疫情，議會同政府要同心抗疫，呼籲踴躍投票。
律政司長鄭若驊喺網誌話，前日同一批中學生交流，話要培養學生具備國家觀念、尊重法治和奉公守法，仲話呼籲學生叫父母、親友去投票。
財政司長陳茂波寫網誌，先讚揚「在中國共產黨領導下……中華民族正步入偉大復興的新征程」，然後指香港都朝住同樣嘅方向邁進，話為咗香港更美好嘅未來，約定大家去投票。
除咗政治問責官員相繼出聲，有屬公務員嘅部門首長都響應，懲教署長胡英明聯同同事拍片，話佢哋除咗堅守最後防線外，更應走出嚟踴躍投票。
更多港聞
【明報專訊】現屆政府任期至明年中，根據香港民意研究所最新調查，只有3名局長民望錄得正數，環境局長黃錦星係其中一人。佢噚日喺港台節目《舊日的足...
詳情
3D打印文物 「捧着歷史」學習 浸大掃描20文物 帶複製品走入中小學
【明報專訊】歷經朝代興衰、原放置博物館櫥窗的北齊佛陀頭像，經3D掃描及打印後，學生可將複製品捧於手中近距離觀察，再無「眼看手勿動」限制。浸大... 詳情
相關新聞
