【Emily】大家食logo設計賽 20強網上投票
【明報專訊】Emily於7月介紹過飲食集團「大家食」搞logo設計賽,希望展示決心改革、建立新形象,冠軍可獲現金10萬元!大家食話收到約千份作品,噚日喺facebook公布甄選出嚟嘅20強,進入網上投票階段,即日起至20號嘅中午前可以投票,方法係喺參賽作品個帖度畀like或心心、哈哈、「WoW」等正面emoji。
Emily所見,暫時領先嘅係11號Edmond Tam作品,概念係一眼就認到,所以設計者選擇用大家食logo本身嘅頭像同字型去重新建構出一個開朗親民嘅氣氛。原logo用上老闆呂茂正不茍言笑嘅樣,11號作品就將老闆個樣整到笑到四萬咁口。
緊隨其後嘅2號Maggie Tse作品,就保留咗老闆喺原logo嘅神韻,概念介紹係咁寫嘅:「呂先生的肖象—因『金槍人』形象深入民心,因此並沒有將他的表情改得太有笑容,而是保留了『有型』和『霸氣』的感覺,這是我認為大家最喜歡的一點」。此作品行簡潔路線,將呂老闆輪廓線條簡化,設計者話係想變得年輕流行又可保留最具特色嘅一部分。