【Emily】消費券增購買慾 環團憂加劇浪費月餅

中秋又到，環團「食得好」同大嘥鬼呼籲大家「月餅唔好嘥」，送禮前應先問收禮者口味、喜好，避免浪費。（食德好提供）

【明報專訊】仲有一個月就中秋節，環保團體「食德好」話疫情好轉，加上政府派5000元消費劵，調查顯示市民購買月餅過節自用或送禮嘅意欲較去年提升，擔心加劇節日剩食問題。食德好呼籲市民送禮要「先問後送」，或者改以月餅之外嘅低碳方式表達心意。

食德好7至8月做網上問卷訪問422個家庭，顯示市民購買月餅意欲較去年大升，自用方面，由去年每家0.99盒增至今年預計每家1.17盒，上升18%；送禮方面則由上年每家0.72盒增至今年預計每家0.98盒，上升36%。

籲送禮前先問對方意願口味

喺消費劵刺激下，約22%受訪者話今年會或考慮增加買月餅嘅預算。食德好項目主任(回收及社區教育)黃煒霖話每年最後食剩、浪費月餅嘅數字往往同整體消費成正比，所以推測今年月餅浪費嘅數字好可能急升。

有六成受訪者話唔會喺送月餅前詢問收禮者嘅意願同口味，黃煒霖鼓勵市民送月餅前先問問對方，為減少浪費行出一大步。