【Emily】fb出post早5分鐘 賀張家朗 財爺出劍快過林鄭
[2021.07.27] 發表
【明報專訊】劍擊比賽快狠準，勝敗關鍵往往是毫釐之差。花劍選手張家朗噚日喺日本競賽激烈，不少政界中人都留意住賽事，特首林鄭月娥同財爺陳茂波等，噚日都喺社交媒體或政府新聞處報喜訊，睇番兩人嘅出post時間，喺張家朗四強賽晉身決賽，以至決賽贏到金牌，陳茂波都比林鄭快約5分鐘。不過，到晚上近11時半，林鄭再出Post反超前，話即晚透過喺東京嘅同事，成功同張家朗視像通話，親自向佢送上祝賀。
林鄭視像向張道賀「反超前」
不過，如果講早，就要數政務司長李家超，因為政務司長辦公室早喺下晝約5點，即張家朗晉級八強戰後已出帖，當時張家朗只晉級四強，仲未確定會有獎牌攞。
張家朗奪金喺全城盛事，當佢噚晚6點幾四強賽勝出，陳茂波6時53分喺facebook出帖，展示佢與同事一齊觀賽；大約5分鐘後，林鄭亦喺facebook出帖，相片顯示佢同民政局長徐英偉等一齊睇比賽，仲留言話喺晚上8時10分，「請全港市民到時放低手上工作，觀看電視直播」。到咗晚上，大家見證張家朗歷史一刻，陳茂波喺8時39分再出帖恭賀，「全香港都為你感到驕傲！恭喜！！！」至於林鄭，呢次就透過官方渠道，喺8時45分透過政府新聞處發稿，話張家朗「成功為香港創造歷史，令人振奮」，新聞稿仲刊出林鄭以前探訪香港劍擊隊嘅相片。
李慧琼出賀帖 網民追擊穆家駿
除咗官員，警察facebook亦出post恭賀張家朗。民建聯主席李慧琼也有恭賀，網民要求民建聯道歉嘅留言就洗版，有人問「出黎(嚟)抽水前，請問潛水金牌穆家駿去咗邊？欠一個道歉喎」，又有網民留言「你條𡃁都攞咗潛水第一名都有金牌」。
更多港聞
【Emily】選委會候選人表格 須申報有冇BNO台灣居留權
【明報專訊】《明報》之前報道過一班係當然選委嘅港區人代同全國政協，要填寫一份「候選人資格審查補充資料表格」交畀候選人資格審查委員會審查，以決... 詳情
【Emily】房協拒議辦提早退租 丘文俊批欠人情味
【明報專訊】區議員宣誓將至，逾200名民主派區議員早前先後辭職，要處理後續事宜都唔容易。已辭職嘅沙田前區議員丘文俊（圖）噚日喺faceboo... 詳情
【Emily】「大家食」搞logo設計賽 冠軍獎10萬蚊
【明報專訊】飲食集團「大家食」嘅logo一直深入民心，噚日佢哋喺facebook出post宣布舉辦「大家食logo設計大賽」，冠軍可以得現金... 詳情相關新聞
